لاو يولوا شلونكم اموركم زينين لو لا عادي اذا مو زينين مابيها شي بعد احسن
اي المهم تعرفون انتو يعني شنو الامتحانات الوزاريه واذا ماتعرفونها فهي يعني امتحان بكل الكتاب حتى وان مامخلصيه والاسئله مايحطوها الاساتذة بالمدرسه الاسئله تجي من الوزارة وزارة التربية وتصخيم اقصد التعليم
اي وهم المهم العام امتحنا امتحانات وزاريه وهذي اسئله الفيزيا الي چتنا ههع
بسم الله الرحمن الرحيم
جمهورية العراق
وزارة التربيه
الاسئله الوزاريه للعام الدراسي 2007\2008
الفيزياء
الوقت :3 ايام واذا تريد اخذ لك يوم ونص هديه هع
ملاحظه :الاجابه على ستة اسئله على ان يكون الاول والثاني والثالث والرابع والخامس والسادس من ضمنها..
السؤال الاول :رواد فضاء صعدوا الى الفضاء واخذو معم ثلاجه بيهه اكل وعلى مسافة كيلو ونص من القمر خلص الاكل وشمروا الثلاجه مناك ..احسب سرعة سقوط الثلاجه علما ان الماطور دنفص ..
السؤال الثاني :واحد ديمشي هوه وصديقه ..(يعني هوه ديمشي ووراه صديقه)والمسافه بينه وبين صديقه متران فقط ..التفت الى الوراء بعد مرور 10 ثوان ولم يجد صديقه ..اين ذهب صديقه؟
السؤال الثالث:سياره تمشي عالقناه نوع اوبل اومكا بسرعة 120 كم / سا صادف مرور كلب سائب امامها على مسافة 20 مترا من السياره ..داس السايق بريك فوقفت السياره على مسافة 2 متر من الكلب (لتخافون ما راح اسألكم شنو نوع الدهن بريك)....اجتي سياره همر مال امريكان ضربت الاوبل من وره ..شكد جان يمشي ابو الهمر؟ علما ان الجندي السايق من ولاية اريزونا الامريكيه..
السؤال الرابع:ولد يمشي في شارع الربيعي على الجهه اليمنه وبنيه عله الجهه اليسره من الشارع انتبه الولد عالبنيه واندعم بتيل .. البنيه ضحكت ..كم عدد البنات صديقات هاي البنيه اللي راح هاي البنيه اتسولفلهن الصار بالولد من وراهه؟ علما ان الولد مضروب بوري قبل 20 دقيقه في نفس الشارع؟؟؟؟؟؟؟
السؤال الخامس :ارسم مؤشرا على الاجزاء طريقة عمل الدولمه..( الدولمه فد اكله )
السؤال السادس والاخير:
علل ما ياتي:
1:السوني اركسون يخلص شحن بسرعه .....
2:المولده التايكر تطلع دخان..
3:لايوضع الصاص والعمبه معا في لفة الفلافل.....
ملاحظه كلش حيل هوايه هامه (لاتلعب بالنار تچوي ايدك) هع
مع تمنياتنا لكم بالموغفية والرسوب
